Serbja

Schleifer TrachtTež we wokrjesu Zhorjelcu je narodna mjeńšina žiwa: Serbja. Woni su potomnicy słowjanskich kmjenow, kiž so po pućowanju ludow wokoło lěta 600 mjez Wódru a Łobjom/Solawu a němskimi srjedźnymi horami zasydlichu. W 10. lětstotku buchu wot Němcow podćisnjene. Z toho časa su w němskej statnosći žiwi. Porno wšelakim druhim narodnym mjeńšinam Serbja maćerny lud w susodnymaj statomaj nimaja. Byrnjež po ličbje jenož mały dźěl ludnosće wučinjeli, su sej Serbja hač do dźensnišeho swoje narodne wosebitosće, swoju rěč a tradicije wobchowali. Serbska chorhoj je módro-čerwjena-běła po přikładźe francoskeje trikolory.

We wokrjesu Zhorjelcu bydla Serbja dźensa předewšěm w Slepjanskej wosadźe. Tute wsy skićeja ze swojej wosebitej architekturu, z domizniskimi stwami a cyrkwjemi nazorne dohlady do žiwjenja něhdy. Dwurěčnosć je na wjesnych taflach a mjenach dróhow zjawnje widźomna a słyšiš ju, hdyž so serbscy wjesnjenjo w swojej rěči rozmołwjeja.

We wokrjesu wuwichu so štyri folklorne regiony. Mužakowska hola dźě bě w zašłosći jedna z najwjetšich lěsnych kónčin. Dokelž skutkowaše jako přirodna hranica mjez sydlišćemi, wuwichu so wšelakore warianty serbskeje narodneje drasty. Buchu zwjetša po wulkich wosadnych wsach w regionje pomjenowane, potajkim Mužakowska, Wochožanska, Klětnjanska a Slepjanska drasta. Rozdźělow pak njebě jenož při narodnej drasće, ale tež w narěčach. W Mužakowje, Klětnom a Wochozach dźensa nichtó wjace wšědny dźeń w serbskej drasće njechodźi. Tuž so praji, zo su to drasty z křinje.

Serbska rěč, kultura, nałožki a hajenje tradicijow maja na wsach Slepjanskeje wosady dźensa hišće krute korjenje. Ptači kwas, camprowanje, debjenje jutrownych jejkow, chodźenje po jutrownu wodu, walkowanje jejkow, chodojtypalenje, stajenje a mjetanje meje, jěchanje wo kołac, dźěćetko a nowolětka su sobu najwažniše nałožki w běhu lěta.

Schleifer Dudelsackspieler

Za zwoprawdźenje naležnosćow serbskeje ludnosće, kotraž we wokrjesu bydli, je wokrjesny sejmik přiradu za serbske prašenja (předsyda je Lothar Bienst, čłonojo su Helmut Krautz, Wolfgang Kotissek, Siegfried Hoche) kaž tež zamołwiteho za serbske prašenja powołał.

nadrobne informacije: www.tourismus-sorben.com  

adresa
Krajnoradny zarjad Zhorjelc/ Landratsamt Görlitz
Dwórnišćowa/ Bahnhofstraße 24
02826 Görlitz/Zhorjelc
póstowa adresa

Krajnoradny zarjad Zhorjelc/Landratsamt Görlitz
(mjeno zarjada)
PF 30 01 52
02806 Görlitz/Zhorjelc


wotewrjenski čas

přehlad stejnišćow a rozdźělenje zarjadow w domach krajnoradneho zarjada